تونقال

1365اینجی گونش ایللرینده ایداره طرفینن کندیمیزه بیر تراکتورچیخمیشدی؛ائله اونا گوره کدده ایکی قالین طایفا بیربیرینین جانینا دوشوب یاریش گئچیردیلر کی وئریلن مالا صاحاب چیخسینلار؛بیر طایفادا پول واریدی تسلیقی اولان یوخودی؛ قارشی  طرفده پول یوخ سوروجو تسلیقی اولان واریدی؛ آخی بیلیرسیز ایداره آدامی تراختوری وئرنده شرط قویموشدی بو دسگاهی سوروجو تسلیقی اولان کیمسه یه وئرمه لیدیلر؛چوخلو چکیش برکیشدن سونرا بو طایفا قارشی سینا گوج گلیب وئریلن اکینه جک ماشینینا صاحاب چیخدیلار؛تراکتورون کنده گلمه ینن چاشقینلیق دوشوب گونن گونه کین کدورت آرتیردی؛آخیردا ایش اورا یتیشدی قارشی طرف کندی قویوب قونشو کددن تراکتور گتیریب یئرلرین شوملاییردیلار؛ایشین بئله قاباغاگئتمه سینه کنده آییری سئچگیلیک دوشوب ایکی طایفا بیربیرلرینن قیز آل وئریده ائله مینده نئچه یول قان توکمه داوا دوشوب ایشلری محکمه یه زاددا چکمیشدی؛اوچ دورد ایل بو گرگینلیده یاشایان کندین جاماهاتی بیربیرینین خییر شرینه ده گئتمیردیلر؛تراکتورون سوروجوسو صوبحان نیسه بئییم خانیمین اوغلو یئنی یئتمه اکبرینن  یولداشلیق ائله ییبپ کندین دارما دالاشینا باخمیاراق ایکیسی بیرلیکده تراختورو ایشله دیب دولتین بورجون اوده ییردیلر؛نیسه بئییمین حیات یولداشی واقتسیز  اولمه توش گلن کیمین گوزونون آغی قاراسی اوغلو اکبره اورک باغلاییب بیردان اوردان گلن نیمداشت ائلچی لرینی قایتاراندا اکبر همی اوغلوم همیده اریمدی دئییه گله جه ینه اومود باغلامیشدی؛فلک سایدیقینی عاقلینا گتیرمه ین آنانین چرخی دونن کیمین صوبحان تراکتورآشیریب اوزو برک یارالاندیقدا اکبر یازیقدا حیاتینی ایتیرمیشدی؛یارالی صوبحان خسته خانایا یئرله شیب داوا درمان اولدوقجا کندین بیر حیصصه سی اکبرین اولومون بهانه ائله ییب بو قانی یئرده قویمایاجاق دئییه قارشی طرفه آخین ائله ییب دهشتلی ویریش دویوش قوپاندان سونرا ایشی محکمه یه سالیب تراکتور سوروجوسو سه اورتاقی (بیمه) اولمادان یارالی یارالی حبس قراری لا زیندانا وئرمیشدیلر؛اوزون بیر محکمه سورندن سونرا صوبحانا یئدی میلیون قان پولو(دییه)اوده مک کسیلیب؛کند یئرینده کسیلن قرار یئرین آلا بیلمه ینده  سوروجوده پولو اوده مه ینجه زینداندا قالماق مجبوریتینده قالان کیمین هر گوروشونه گلن کیمسه یه یالوار یاخار ائله ییب نئجور قوتاراجاغام  دئییه گوزونون یاشین توکوردی؛بو نئچه ایلده قوروم قونشو کددن توکولوب ریضایت ایسده ینده نیسه بئییمی قیسقانجا قویان قارداشلاری ریضایت اولماز دئییه اوتونون اوسدونه یئنی دن اوت قویوردولار؛ایشین سونوندا بیر تراختورا گوره گوندن گونه کندین ایشینی دوگونه سالان باجاریقسیزکیشی لرین الیندن جانا گلن دیللی دیلاور نیسه بئییم صوبحانین ننه باجیسی نین گوزون یولدا گورنده ایل بایرامینا بئش اون گون قالمیش بیر قاب حالوا چالیب قبیر اوسده پایلایاندان سونرا کندین جاماهاتین ییغیب مچید قاباغینا بو ایشین کیمسه یه داخلی یوخ دئییه باشینداکی قارا یایلیقی گوستریب اوتانین کیشی لر اینسانا قیمت اولمازدئییه آشیری گون شهره یوللانیب صوبحانی حبسیدن قوتار ماغینان کندیمیزه یئنی بایرام................................